Dr Karle Hank - sell ist oar gsei',
sotte geits heut koane maeh!

Hot ma' früher ebbnets gheiret,
täufet, ta'zet, Kirbe gefeiret
oder sust e' Festerei,
noh host Gift druf nemme' könne':
überal demittledenne'
ist dr Hanke'-Karle gsei'.

Des sei, so hat er gsait,
sei' Pflicht ond Schuldigkeit
als Christ
ond Zenkenist.

Älls was reacht ist, wenn er ao
nia koa' Lust zom Schaffe' ghet hot,
aber öfters, as ma' sott,
dodefür en Affe' ghet hot -
ufgspielt hot er flott,
sell muaß ao dr Feind ehm lao'!

Heut noh haör-e s Klarinettle,
heut noh sieh-n-en, wia-n-er schwitzt,
wia-n-er hentrem Noteblättle
noch de jonge Mädlen spitzt.

Karle, Karle, laß des gaoh',
neamed ka' beim Flötlesspiele'
au noh noch de Mädlen schiele',
sust ist glei deneabe' griffe',
ond de muaßt der sage' lao':
gfengerlet ist et pfiffe'!

Oamol hot er gspielt wia bsesse',
Polka, Shottisch, wia de's hao' witt,
ond vor lauter Laß-me-au-mit
hot er s Trenke schier vergesse'.
Herr, wia hend dia Füß sich gregt
ond dia Röck de' Bode' gfegt!
So e' Musek loht ma' gelte',
sotte Triller haört ma' selte',
dorom hend se, wia ses ghaört,
ao de' Musikante' gaehrt:
Do e' Viatele, doot en Schoppe',
selt e' Gläsle, do en Schluck!
Karle, laß de nao et foppe',
weis' mr nao dean Wei' et zruck!

Do kennst de Hanki-Karle schleacht,
so paßts em ond so ist ems reacht.

Freile, älls mit Maß ond Ziel:
schätzwohl noch me' guate' Dutzed
Viatelen hot er s Maul aputzet,
ond ma' merkt: iatz wuds em zviel.
0, wia des de' Karle gheit,
daß er et noh maeh vertrait!
"Karle, komm doch, noh dean Stompe',
Karle, laß de doch et lompe'..."
Dodruf ka'-n-er nao noh sa:
"0 des ist e' baöse Klemme',
o ihr Herre', i ka' nemme' -
schüttets über me na!"

Aus: Rottenburger Hauspostille, Stuttgart: Konrad Theiss Verlag 1976.