guck dr d rebahäng a'
rond om stuagert
horch wia s ausm boda gluckert
ganze sprudelbecka füllt em talgrond
dort
ond dort
ond dort -
s ka' garnet anderscht sei':
d stuagerter müeßet s wasser möga
o n d  da' wei'!

guck dr d skailain a' von stuagert
steig da' hasaberg
da' bopser nuf
lauf übern haigscht von degerloch
d alt wei'steig nonter
über stròßa wegla stäffela
nuf ond nonter
nuf ond nonter -
s gilt fürs gläuf
ond s gilt für d denketse
s gilt en jedem fall
ond überaal
d stuagerter strahlet
oder maulet (je nòchdem)
ob se en buckel vor sich hent
oder
a tal!

guck dr d eberhardskirch a
uf dr königstròß en stuagert:
lenks drneba d girokass
rechts drneba d dresdner bank -
laß dr amòle
d "stuagerter privilegierte" zeiga
dia dort ufananderbeigte büecher zeiga
(honderttauset ganget jede woch drvo'
en d welt) -
lies d statischtik nòòch
wiaviel gschäftsleut s hòt en stuagert
wiaviel millionär -
nò därfscht saga
(ond se nemmet drs netamòle übel!):
d stuagerter schätzet ihren kontoauszug
von dr bank
als lektüre
(onter omständ)
grad so wia en abschnitt
aus
dr bibel!
 

Anmerkungen des Verfassers
bopser    hausberg von stuttgart
haigst    anhöhe unterhalb degerloch
stuagerter privilegierte    bibelanstalt in der hauptstätterstraße