a bleistift
ka'scht mit ema spitzer
wia en räddich rädla

an ema bleistift
ka'scht wia ama knocha naga

uf ema bleistift
ka'scht mit em fengernagel
de schönschte ornament nei'ritza

mit ema bleistift
ka'scht (wenn d s ka'scht)
a drama schreiba
ka'scht en dr na'sa grubla
deine augenbraua zirkla
ka'scht dei' haipflziach vermessa
d zahlascheib am télefoo romtriibla
ka'scht (wenn de s henters ohr steckscht)
als a obersekretär ufftretta
ka'scht oin (wenn needich)
kampfo'fähich stecha

dees älles (ond vielleicht noh meh)
ka'scht mit ema kloina bleistift macha

mensch
was ka'scht nò erscht älles
mit era telegrafastang?