in dera etasch doda schloft und rost ana,
a r oame glana schdudent dea wos in amor in pfäu grend is -
francois villon hod a kassn..
bedind woa r a, kaa schdraffal eadn hod eam kead,
owa drozzdem hod a r olas faschengt (wia r a jeda was):
en disch, es bet und s brod sogoa mezzaumt n keawal!

i bit eich ole, was s faliabt seit s,
bet s fia r eam wia foigt:

gebet:
herr, gib eam d eweche rua
und s eweche liacht dazua!"
sei döla woa r ima leea,
sei essn ungefeea
ned gressa r oes a grüü,
kaa schdammal bedasüü
hod ea sei lem ned xeng,
gaunz gloa, das ea dessweng
oes wia r a radi woa -
a gschöda - ned a hoa
aum kopf, kaa boad, kaa braun -
a glachta fia de fraun.
herr, gib eam d eweche rua!

gjaugt haum s eam in s exüü
med oaschdrit, mea r oes z füü -
und ea hod brotestiad..
wem hot des scho scheniad?
herr, gib eam d eweche rua!